Ben Joakim 

Yn angerddol dros adeiladu Cymru fwy llewyrchus a chynaliadwy, mae Ben yn arweinydd gweithredol ac anweithredol profiadol, ar ôl dal nifer o uwch rolau mewn amrywiol sectorau, ledled Cymru ac yn rhyngwladol.

Ben yw Cadeirydd yr IWA ar hyn o bryd, yn gweithio i sicrhau llywodraethiant a strategaeth effeithiol. Mae hefyd yn Gynghorydd yn y Porthladd Rhydd Celtaidd, gan weithio’n agos gyda’r Prif Weithredwr a phartneriaid i adeiladu coridor buddsoddi ac ynni gwyrdd i Gymru.

Cyn hynny, bu Ben yn arwain strategaeth yng Nghymdeithas Adeiladu’r Principality fel aelod o’r tîm Gweithredol. Roedd hefyd yn Aelod o Fwrdd Fintech Wales, gan helpu cwmnïau cyllid a thechnoleg i gychwyn a thyfu o Gymru.

Treuliodd Ben ran sylweddol o’i yrfa yn gweithio ledled yr Affrica Is-Sahara, gan fuddsoddi mewn mentrau cyflogaeth a menter ledled y rhanbarth. Wedi hynny sefydlodd Disberse, cwmni Fintech sy’n gyrru tryloywder ac effeithlonrwydd ar gyfer cymorth byd-eang, gan ddylanwadu ar bolisi byd-eang.

Mae Ben yn gyn-fyfyriwr o Goleg yr Iwerydd a Phrifysgol Caerdydd. Mae’n byw ym Mro Morgannwg.

Alison Copus

Mae Alison Copus yn Ymgynghorydd Marchnata. Fe’i ganed ym Mhen-y-bont ar Ogwr, a graddiodd o Brifysgol Bryste.

Mae Alison wedi arbenigo mewn marchnata rhyngwladol ac mae wedi gweithio mewn amrywiaeth eang o ddiwydiannau o wasanaethau ariannol i gwmnïau hedfan, y cyfryngau digidol ac addysg, gyda rolau marchnata uwch yn American Express, Virgin Atlantic a TripAdvisor. Yn ystod ei chyfnod yn Virgin Atlantic, roedd yn rhan o’r tîm rheoli oedd yn gyfrifol am dwf y cwmni hedfan o bedair awyren i 40. Lansiodd The Branson School for Entrepreneurship yn Ne Affrica i ddarparu addysg busnes a chronfeydd sbarduno ar gyfer pobl ifanc o’r gymuned a oedd yn ddifreintiedig yn flaenorol. Yn ystod ei chyfnod gyda TripAdvisor, roedd Alison yn gyfrifol am farchnata Ewropeaidd  i ddechrau ac yn dilyn hynny roedd yn gyfrifol am lansio ffrydiau refeniw newydd yn fyd-eang. Cyn dychwelyd i Gymru, roedd Alison yn Brif Swyddog Marchnata ar gyfer Nord Anglia Education. Yn ystod ei chyfnod yno, tyfodd y grŵp ysgolion rhyngwladol i 43,000 o fyfyrwyr gan ddyblu o ran gwerth.

Sam Evans

Yn hanu o’r Porth yn y Rhondda, mae Sam wedi treulio ei yrfa broffesiynol yn gwella canlyniadau a disgwyliadau rhai o’r bobl fwyaf agored i niwed mewn cymdeithas. P’un ai drwy ddemocratiaeth, technoleg neu addysg, mae’n uwch arweinydd profiadol sy’n rhoi effaith y gellir ei mesur wrth galon popeth a wna.

Treuliodd Sam ran gyntaf ei yrfa yn addysgu, gan gyflawni Rhaglen Datblygu Arweinyddiaeth Teach First yn Coventry, cyn dechrau ar rôl yn San Steffan gyda’r Comisiwn Ewropeaidd. Yno bu Sam yn goruchwylio rhaglenni addysg ac allgymorth y Comisiwn a Senedd Ewrop yn y DU. Pan ymadawodd y Deyrnas Unedig â’r UE, arweiniodd gyfres o egin-fusnesau newydd ym meysydd democratiaeth ac addysg ar raddfa genedlaethol, gyda’r nod o roi mynediad uniongyrchol i bobl ifanc yn y DU at liferi pŵer. Ar hyn o bryd mae’n helpu Robert Peston i redeg ei elusen symudedd cymdeithasol fel Pennaeth Rhaglen (Profiad).

Mae gan Sam radd a gradd Meistr mewn Hanes, mae’n gyn-gadeirydd bwrdd llywodraethu Ysgol Gynradd ac yn gyn-aelod o Blaid Cymru.  Mae’n chwaraewr sboncen brwd a gellir dod o hyd iddo’n aml gyda raced yn ei law.

Dr Elizabeth Haywood

Mae Elizabeth wedi bod yn Gadeirydd Bwrdd Taliadau Annibynnol y Senedd ers 2020.  Mae hi’n Gyfarwyddwr Anweithredol ac yn Gadeirydd profiadol. Cyn hynny, roedd hi’n aelod o Fwrdd Cyfoeth Naturiol Cymru ac yn Gadeirydd ei Bwyllgor Rheoli Perygl Llifogydd, yn aelod o Fwrdd Scottish Power Energy Networks, Grŵp Hendre, Leonard Cheshire, yn aelod annibynnol o Fwrdd Taliadau Swyddfa Archwilio Cymru, ac yn Gadeirydd cyntaf WCVA Services Ltd. Bu’n gadeirydd Tasglu Gweinidogol Llywodraeth Cymru ar Ddinas-ranbarthau.

Treuliodd ei gyrfa gynnar yn Senedd Ewrop ac Asiantaeth Datblygu Cymru, cyn cael ei phenodi’n Gyfarwyddwr CBI Cymru, Cyfarwyddwr Cyfathrebu Cymdeithas y Cwmnïau Gweithredu Trenau ac yna bu’n rhedeg cwmni chwilio gweithredol yng Nghaerdydd a Llundain.

Mae ganddi radd economeg o Brifysgol Caerdydd, PhD a doethuriaeth er anrhydedd o Abertawe. Hi dderbyniodd Gwobr Menyw y Flwyddyn Cymru y tro cyntaf i’r wobr gael ei chyflwyno ac mae’n Gymrawd er Anrhydedd ym Mhrifysgol y Drindod Dewi Sant. Dechreuodd ysgrifennu yn ddiweddar a chyhoeddwyd ei nofel hanesyddol gyntaf yn 2021.

Kelly Huxley-Roberts

Gyda gradd Meistr mewn Addysg Oedolion ar gyfer Newid Cymdeithasol a deng mlynedd o brofiad ym maes datblygu cymunedol, ymchwil gyfranogol a threfnu cymunedol, mae Kelly yn cyfrannu arbenigedd mewn ymgyrchoedd strategol, ymgysylltu â dinasyddion, a dylanwadu i’r bwrdd.

Yn wreiddiol o Ynys Môn ond bellach wedi ymgartrefu ger Wrecsam, dechreuodd Kelly astudio Sbaeneg ac Almaeneg yn St Andrews cyn symud i Dde America a dechrau gyrfa yn canolbwyntio ar adeiladu pŵer cymunedol er newid cadarnhaol. Mae hi bellach yn gweithio fel Rheolwr Polisi a Phartneriaethau Cymru ar gyfer Sefydliad Lloyds Bank, rôl sy’n canolbwyntio ar gryfhau partneriaethau a chynyddu gallu elusennau i ddylanwadu yng Nghymru. Cyn hynny, hi oedd Arweinydd Pobl, Ymgyrchoedd a Dysgu TCC Cymru, lle bu’n gweithio gyda grwpiau cymunedol a chynghreiriaid i ddylanwadu ar faterion yn ymwneud â lliniaru tlodi, tegwch a chynhwysiant yng Nghymru.

Mae Kelly yn siarad Cymraeg ar lefel ganolradd, ac yn ei hamser hamdden mae’n aelod gweithgar o’r Clwb Clebran yn Wrecsam, sy’n ceisio hyrwyddo’r defnydd o Gymraeg yn Wrecsam. Mae hi hefyd yn datblygu menter NEW Thinking Space, sy’n ceisio annog meddylwyr y Gogledd-ddwyrain i ddod at ei gilydd a meddwl yn wahanol.

Jessica McQuade

Jessica McQuade yw Rheolwr presennol Rhaglen Wholescape WWF UK sy’n datblygu dull systemau sy’n seiliedig ar dystiolaeth o adfer yr amgylchedd naturiol ar lefel ranbarthol. Mae ganddi dros 20 mlynedd o brofiad o weithio mewn cymdeithas sifil, gan arwain a galluogi newid polisi, gwleidyddiaeth a deddfwriaeth yng Nghymru, gan gynnwys Deddf Llesiant Cenedlaethau’r Dyfodol, Deddf yr Amgylchedd (Cymru) a Deddf Cydraddoldeb 2010. Mae hyn wedi arwain at wybodaeth helaeth ar draws yr agenda newid hinsawdd ac adfer natur. Ar hyn o bryd, mae’n sianelu ei holl egni i mewn i’r ‘her driphlyg’ o fynd i’r afael â’r materion hyn wrth bontio i system fwyd gynaliadwy. Mae ganddi hefyd flynyddoedd lawer o brofiad o gyd-gynhyrchu a grymuso cymunedol ac mae wedi ymrwymo i lunio polisïau cynhwysol. Yn ddiweddar, symudodd Jessica i Orllewin Cymru o Gaerdydd ac yn ei hamser hamdden mae’n ymgyrchu gyda grwpiau lleol ar ansawdd dŵr ymdrochi ac iechyd afonydd. Hi yw un o 100 o Ysgogwyr Newid cyntaf Comisiynydd Cenedlaethau’r Dyfodol yng Nghymru.

Helen Mortlock

Mae Helen Mortlock yn Gyfarwyddwr Cyfreithiol yn Eversheds-Sutherland LLP.

Mae Helen yn Gyfarwyddwr Cyfreithiol yng ngrŵp sector addysg genedlaethol y cwmni ac mae wedi gweithio yn y grŵp hwn ers 1994. Mae’n arwain tîm gwasanaeth cyfan sy’n gweithredu ar ran y rhan fwyaf o brifysgolion a cholegau cymru a De-orllewin Lloegr, ynghyd a sawl sefydliad yn Llundain a De-ddwyrain Lloegr.

Yn ystod ei gyrfa, mae Helen wedi ymdrin â nifer o faterion cymhleth ac uchel eu proffil ar gyfer Prifysgolion, gan gynnwys diwygio’r statud enghreifftiol, amddiffyn hawliadau gan staff a delir fesul awr a oedd yn hawlio cydraddoldeb â staff academaidd safonol, trefniadau ailstrwythuro, uno a chyd-wasanaethau niferus, ymdrin â honiadau chwythu’r chwiban yn ymwneud â chynghorau ymchwil, a chyngor ar gontractau academaidd clinigol.

Anthony Pickles

Mae Anthony Pickles yn arweinydd polisi cyhoeddus ar gyfer cwmni cyfreithiol rhyngwladol. Mae wedi gweithio mewn nifer o swyddi polisi yn sector twristiaeth y DU a’r sector fodurol fyd-eang ac fel Pennaeth Staff y Ceidwadwyr Cymreig. Mae wedi bod yn ymgeisydd seneddol mewn etholiadau cyffredinol ac Ewropeaidd ac wedi gweithio’n helaeth mewn ymgyrchoedd a gwaith darparu maniffesto, gan helpu i gydlynu ymgyrch etholiad cyffredinol 2015 yng Nghymru. Yna aeth ymlaen i ddatblygu cais llwyddiannus diwydiant twristiaeth y DU am gytundeb sector yn strategaeth ddiwydiannol Llywodraeth y DU a gweithredu fel llefarydd i’r sector am nifer o flynyddoedd. Mae’n frwdfrydig dros Gymru a llwyddiant y wlad yn y dyfodol. Fe’i haddysgwyd yn Aberystwyth ac mae’n ysgrifennu cylchlythyr wythnosol ar ddatganoli o’r enw ‘State of the Union’.

Gwendolyn Sterk

Gwendolyn yw Prif Weithredwr Rhwydwaith Cydgynhyrchu Cymru, gan weithio i ymgorffori’r arfer o gydgynhyrchu a chyfranogiad mewn gwasanaethau cyhoeddus a’r trydydd sector. O fewn ei chefndir yn y sector trais yn erbyn menywod, gweithiodd i sicrhau bod profiad byw menywod yn ganolog wrth ysgogi newid mewn deddfwriaeth genedlaethol a gwella darpariaeth gwasanaethau, gan gynnwys y Ddeddf Trais yn erbyn Menywod, Cam-drin Domestig a Thrais Rhywiol (Cymru) 2015 a’i strategaethau cenedlaethol dilynol.

Mae gan Gwendolyn ymrwymiad dwfn i fynd i’r afael ag anghydraddoldebau cymdeithasol trwy weithredu ar y cyd mewn cymdeithas sifil. Mae hi wedi arwain ar ymgyrchoedd i ddod â thrais rhywiol i ben, gan gynnwys Time’s Up yng Nghymru ac mae wedi cyhoeddi ar gynrychiolaeth y cyfryngau o drais rhywiol. Trwy gydol ei gyrfa, mae hi wedi cael ei gyrru gan bwysigrwydd creu lleoedd i amrywiaeth o fenywod siarad yn onest â phŵer.

Mae hi hefyd wedi gweithio gyda thimau comisiynu a datblygu gwasanaethau awdurdodau lleol sy’n cefnogi ystod o feysydd gwasanaeth gan gynnwys gwasanaethau cyffuriau ac alcohol ac ymyriadau sy’n gysylltiedig â thlodi.

Mae ganddi MSc mewn Cysylltiadau Rhyngwladol a Rhywedd, sy’n ymchwilio i ddefnydd confensiynau’r Cenhedloedd Unedig gan fudiadau ffeministaidd trawswladol. Hi oedd Arbenigwr y DU ar Arsyllfa Lobïo Menywod Ewrop ar VAWG 2016-22.

Lauren McEvatt

Mae Lauren yn gyn-Ymgynghorydd Arbennig i Swyddfa Cymru dan Lywodraeth Geidwadol y DU, lle bu’n gweithio o dan David Jones AS, Ysgrifennydd Gwladol Cymru ar y pryd. Roedd ei chyfnod o wasanaeth yn ymdrin â drafftio a chyflwyno cyfraniad Llywodraeth y DU i Gomisiwn Silk, yn ogystal â drafftio a chamau cychwynnol Deddf Cymru 2014.

Mae Lauren yn arbenigwr materion llywodraeth a chyfathrebu sydd wedi gweithio ar draws Ewrop, Affrica a’r Caribî, lle cefnogodd drafodaethau ar ddiwygio cyfansoddiadol Tiriogaeth Dramor Prydain, ac ar fasnach a buddsoddi ar draws swyddfeydd datganoledig a chenedlaethol y llywodraeth yn Affrica. Ar hyn o bryd, mae’n aelod o Bwyllgor Cymru’r Comisiwn Cydraddoldeb a Hawliau Dynol.

Ganwyd Lauren yn Lloegr i rieni Gwyddelig ac Americanaidd, a magwyd hi yn Hong Kong. Ar hyn o bryd, mae’n gweithio ym maes materion rhyngwladol y llywodraeth sy’n ymwneud ag ymgysylltiad y sector cyhoeddus a phreifat â sefydliadau amlochrog a sefydliadau datblygu, a chyn hynny bu’n Gomisiynydd i’r Comisiwn Annibynnol ar Ddyfodol Cyfansoddiadol Cymru.

Shayoni Lynn

Shayoni yw Prif Weithredwr a Sylfaenydd ymgynghoriaeth gyfathrebu gwyddor ymddygiadol aml-wobrwyol, Lynn Group. Mae’n Gymrawd o’r Sefydliad Cysylltiadau Cyhoeddus Siartredig (CIPR) a’r Gymdeithas Cysylltiadau Cyhoeddus a Chyfathrebu (PRCA), ac mae’n Gadeirydd ar PRCA Cymru.

Rhestrir Shayoni yn Llyfr Pŵer PRWeek (2021-presennol) – y rhestr ddiffiniol o’r gweithwyr cyfathrebu mwyaf dylanwadol ac uchel eu parch yn y DU. Yn 2024, ymddangosodd ar ddwy restr arbenigol – ymhlith yr 20 o fenywod mwyaf dylanwadol yn y DU ym maes Cysylltiadau Cyhoeddus, a’r 10 arweinydd cysylltiadau cyhoeddus gorau y tu allan i Lundain.

Yn 2023, ymddangosodd yn rhestr 15 i’w Gwylio ac Arloeswr 25 EMEA Global gan PRovoke Media, ac yn rhestr yr 20 o Indiaid Mwyaf Nodedig y Byd (Top 20 Global Indians list) gan Reputation Today.

Ymhlith penodiadau eraill, mae Shayoni yn Aelod o Fwrdd Teithio Llesol Cymru, Bwrdd Cysylltiadau Cyhoeddus a Chyfathrebu PRCA, yn aelod o’r panel sefydlu ac yn Is-gadeirydd ar Grŵp Diddordeb Mewnwelediad Ymddygiadol CIPR, ac ICCO x UNDP Climate Comms Taskforce, gan ddarparu cyngor strategol ar gyfer ymgyrchoedd newid yn yr hinsawdd byd-eang, aml-farchnad Rhaglen Ddatblygu’r Cenhedloedd Unedig (UNDP).

Mae Shayoni yn gyd-sylfaenydd ac yn Gadeirydd ar y Rhwydwaith Cyfathrebu Asiaidd. Mae hi’n arweinydd meddwl byd-eang ac yn siaradwr ar y defnydd effeithiol o wyddor ymddygiadol, dadansoddi data, strategaeth gamwybodaeth, a mesur a gwerthuso mewn cysylltiadau cyhoeddus a chyfathrebu, gan arbenigo mewn iechyd, a newid yn yr hinsawdd a chynaliadwyedd.